Ճշտում ենք ինֆորմացիան` արդյոք վարչապետին հարց ուղղած ադրբեջանցին անվտանգության ծառայող է, թե ոչ, իսկ վարչապետի հետ հանդիպումը բաց է եղել. Վլադիմիր Կարապետյան
Ճշտում ենք այդ ինֆորմացիան, թե արդյոք Միլանում հայկական եկեղեցի ներխուժած և ՀՀ վարչապետ Նիկոլ Փաշինյանին հարցեր ուղղած ադրբեջանցի բլոգերը անվտանգության աշխատակից է: Այս մասին Tert.am-ի հետ զրույցում ասաց վարչապետի մամուլի խոսնակ Վլադիմիր Կարապետյանը:
Ինչ վերաբերում է հարցերին՝ նախապես չի որոշվում, թե վարչապետի հետ հանդիպմանը հայ համայնքից ովքեր են լինելու, դա ինչպե՞ս է կանոնակարգվել, մուտքն արդյոք ազատ է եղել, Վլադիմիր Կարապետյանը պատասխանեց. «Եկեղեցին հայտարարությունը հրապարակային է արել, մասնակցությունը ազատ էր, այսինքն՝ ցուցակագրում չի եղել: Պարզապես անվտանգության ծառայությունների կողմից համապատասխան ստուգումներ են անցկացվել: Մուտքը ազատ է եղել նախօրոք հրապարակված հայտարարության հիման վրա»,- ասաց նա:
Հիշեցնենք, որ երեկ Միլանի Հայ Առաքելական Սուրբ Քառասուն Մանկունք եկեղեցում հայ համայնքի ներկայացուցիչների հետ ՀՀ վարչապետ Նիկոլ Փաշինյանի հետ հանդիպմանը եկեղեցի էր մտել մի ադրբեջանցի, որը ներկայացել էր որպես բլոգեր և հայտարարել էր՝ քանի որ Նիկոլ Փաշինյանը ժողովրդավար է, նրանից խնդրում է դադարեցնել պատերազմը:
Նա վարչապետին ասել էր. «Մեզ պատերազմ պետք չէ, ազատեք մեր հողը»:
«Փաստ է, որ Դուք` լինելով ադրբեջանցի, մտել եք հայկական եկեղեցի, որտեղ գտնվում են հայեր, և հարց տվեցիք Հայաստանի վարչապետին: Իմացեք, որ հայը հնարավորություն չէր ունենա մտնել միջոցառման, որտեղ ներկա է Ադրբեջանի նախագահը»,- պատասխանել էր Նիկոլ Փաշինյանը:
Ավելի ուշ «Ռազմինֆո» կայքի համակարգող Կարեն Վրթանեսյանը հայտարարեց, որ Միլանում հայկական եկեղեցում հայ համայնքի հետ հանդիպման ժամանակ ՀՀ վարչապետ Նիկոլ Փաշինյանին հարց ուղղված ադբրեջանցին իրականում անվտանգության ծառայող է։
