Ժողովուրդը զիջումների պատրաստ չէ. կարծիք
Ես չգիտեմ, թե Արցախյան հակամարտության բանակցային գործընթացն ինչպիսին է հիմա, ինչ են խոսում ու քննարկում, բայց, վստահաբար, որևէ զիջման կողմնակից չեմ: Եթե մեր պայմանավորվածությունը խաղաղության համար զիջումներով է, ես՝ որպես զինվոր մարդ, դեմ եմ: Այս մասին ԼՈՒՐԵՐ.com-ի հետ զրույցում ասաց ԱՍԱԼԱ-ի Վան գործողության հրամանատար Վազգեն Սիսիլյանը:
Սիսիլյանը կարծում է, որ Արցախի հարցը պետք է լուծվի այն տարբերակով, որը ձեռնտու կլինի Արցախին ու Հայաստանին:
«Մենք Արցախի հարցի կարգավորմանն ավելի գրագետ ենք վերաբերվում: Եթե հարկ լինի, մեր պատասխանն էլ կլինի կոշտ ու կլինի հենց ժողովրդի կողմից: Ես՝ որպես անհատ, պատրաստ չեմ ոչ մի սանտիմետր հող զիջելու: Կարծում եմ՝ ինձ հետ շատերը համաձայն կլինեն: ժողովուրդը զիջումների պատրաստ չէ: Իսկ վարչապետը ժողովրդի կամքը պետք է իրականացնի: Մարդիկ իրենց երեխաներին բանակ են ուղարկում, կյանք են դնում, պայքարում են»,- նշեց նա:
Սիսիլյանն ասում է, որ Ալիևի խոսքերին մեծ արժեք չի տալիս. «Նա պատերազմի մասին անընդահատ խոսում է, որ համոզի ինքն իրեն ու իր ժողովրդին, որ կարող են հաղթել: Հնարավոր է՝ Ադրբեջանը փորձի նորից պատերազմի միջոցով հարցեր լուծել: Այդ դեպքում մենք պատրաստ ենք առաջ գնալ: Դատարկ խոսքերն ինձ համար ոչինչ են»:
Նա նշեց, որ պաշտոնական հարցազրույցներին ու մեկնաբանություներին այնքան էլ չի հետևում. «Փաշինյանի հայտարարությունները չեմ ուզում մեկնաբանել: Ես չեմ լսում, ինձ հայտարարությունները չեն հետաքրքրում: Ինձ հետաքրքրում է այն, ինչ կատարվում է գետնի վրա: Մեր զինվորն իր դիրքում է, մի քայլ ետ չի գնում, իսկ կարևորը հենց սա է»:
Մեզ հետ զրույցում Սիսիլյանը նաև պատմեց, որ ապրում ու աշխատում է Երևանում, բայց շատ հաճախ է լինում Արցախում. «Հաճախ եմ գնում Արցախ: Ուղղորդում եմ այն ընկերներիս, ովքեր փորձում են որևէ կերպ աջակցել մեր զինվորներին: Միասին տարբեր զորամասներում ենք լինում»:
Նրա խոսքով՝ այսօր մեր բանակի վիճակը ավելի լավ է, քան տարիներ առաջ էր. «Հիմա սահմանից, երբ վերադառնում եմ, միտքս հանգիստ է լինում: Բացարձակ վստահություն ունեմ մեր 18 տարեկան զինվորի հանդեպ: Ես այդ զինվորների մեջ տեսնում եմ ինձ: Նրանք նվիրած են իրենց հայրենիքն»:
