ԱԺ-ն ուսումնասիրում է մեդիա դաշտը կարգավորող օրենսդրությունը
ՀՀ Ազգային ժողովն ուսումնասիրում է հայկական մեդիա դաշտը կարգավորող օրենսդրությունը՝ այն ժամանակակից աշխարհի պահանջներին համապատասխանեցնելու նպատակով: Այս մասին նոյեմբերի 27-ին «Ֆեյսբուք»-ի իր էջում գրել է ԱԺ «Իմ քայլը» խմբակցության պատգամավոր Անուշ Բեղլոյանը:
«Նոյեմբերի 26-ին Եվրոպայի Խորհրդի Հայկական մեդիա դաշտի կարիքների գնահատման ծրագրի կլոր-սեղան քննարկմանը ներկայացրել եմ ՀՀ օրենսդիր մարմնի առաջ կանգնած մարտահրավերները մեդիա ոլորտի կարգավորման բնագավառում։ Քննարկումը նվիրված էր Հայկական մեդիա դաշտի կարիքների գնահատման զեկույցի ներկայացմանը։ Ելույթիս ընթացքում անդրադարձել եմ ՀՀ-ում մեդիա դաշտի խնդիրներին, նշել, որ գլխավոր մարտահրավերն է նպաստել մեդիա դաշտի ինստիտուցիոնալ կայացմանը, ինչը ենթադրում է հասարակության վստահության բարձրացում լրատվամիջոցների հանդեպ։ Եվս մեկ կարևոր առաքելություն է լրատվամիջոցների դերը իշխանության և մասնավոր հատվածի թափանցիկության ու հաշվետվողականության ապահովումը»,- գրել է Բեղլոյանը:
Պատգամավորը նշել է, որ մարտահրավերների շարքում է այն հանգամանքը, որ հայկական մեդիան ազատ է, բայց ոչ անկախ։
«Անդրադարձել եմ մեդիա ոլորտը կարգավորող օրենսդրությանը և լրատվամիջոցների աշխատանքը կարգավորելու, բայց խոսքի ազատության և ժողովրդավարության սահմանը չանցնելու անհրաժեշտությանը։ Ամբողջ աշխարհում մարտահրավերներ են կեղծ լուրերը, քաղաքականապես ուղղորդվող տեղեկատվությունը, հանրային շահին հակառակ գործող մեդիան, և, Հայաստանը աշխարհի անբաժան մասը լինելով, առնչվում է այս մարտահրավերներին։ Հանդիպման կազմակերպիչներին և մասնակիցներին տեղեկացրի, որ այժմ Ազգային ժողովը ուսումնասիրում է մեդիա դաշտը կարգավորող օրենսդրությունը, որը պետք է համապատասխանեցվի ժամանակակից աշխարհի պահանջներին: Շնորհակալություն հայտնեցի Եվրոպայի խորհրդին նման կարևոր հետազոտություն իրականացնելու համար, որը կօգնի շահագրգիռ կողմերին տեսնել օրենսդրական բացերը, որը ևս կօգնի գտնել դրանք արդյունավետ վերացնելու լավագույն ճանապարհները»,- նշել է նա:
