«Նա է իմ միակ ու իսկական սերը». Ալեքսանդր Բաբասյան
Նա չի ընդունում ստացած յուրաքանչյուր առաջարկ եւ ամեն անգամ կերպար կերտելիս յուրովի է մոտենում իր առջեւ դրված խնդրին: Անչափ շատ է սիրում դերասանի մասնագիտությունը, բայց բոլորից ու ամենից շատ սիրում է որդուն՝ 5-ամյա Ալեքսանդրին: BRAVO.am-ի հետ նոր զրույցում Ալեքսանդր Բաբասյանը պատմել է իր եւ որդու՝ 2 ամիս ու ավելի տեւած բաժանման, կարոտի, հետաձգված նկարահանումների մասին, եւ ոչ միայն:
Դերասանը, սովորության համաձայն, յուրաքանչյուր նախագծից հետո փոքր-ինչ դադար է վերցնում. վստահ է՝ անհրաժեշտ է հանգստանալու ու մտքերն ի մի բերելու ժամանակ, որպեսզի հետո ներկայանա նոր խոսքով ու ասելիքով: Իսկ «Պատվից առավել» սերիալից հետո ունեցած դադարի ժամանակ զբաղվել է իր բիզնեսներն ընդլայնելով եւ կայունացնելով:
Ալեքսանդր Բաբասյանը
«Այս ընթացքում նկարահանվելու 1-2 առաջարկ եմ ունեցել, սակայն մերժել եմ: Ես չափազանց շատ եմ սիրում դերասանի մասնագիտությունը, չմոռացվող կերպարներ կերտելը, նաեւ՝ սիրված լինելը: Այդ իսկ պատճառով չեմ ուզում հիասթափեցնել իմ լսարանին. գիտեն, որ ամեն առաջարկ չեմ ընդունում եւ ամեն կերպար չեմ կերտում»,-ասել է նա, ապա հավելել, որ ամեն անգամ հատուկ աշխատում է ամբողջական կերպարի՝ արտաքինի, ոճի վրա, մշակում իր խոսքն ու անգամ ժեստերը:
Նկարահանման հրապարակում կարեւորում է գրագետ աշխատանքն ու հենց դրանից էլ հաճույք է ստանում.«Դերասանը չպետք է ծանրաբեռնված աշխատի: Ճիշտ չեմ համարում մեկ օրվա մեջ բազմաթիվ հույզեր ստանալը: Եթե որեւէ տեսարան այնքան էլ սրտովս չի լինում, չեմ հանձնվում եւ փորձում եմ 2-րդ կամ գուցե եւ 3-րդ անգամ, մինչեւ ստանամ իմ ուզածն ու պատկերացրածը»:
Ալեքսանդրից հետաքրքրվեցինք՝ արդյոք բաց է նոր առաջարկների համար.«Չեմ բացառում նորից նկարահանվել, հնարավոր է` հենց վաղն էլ ստանամ լավ առաջակ եւ մտածեմ այդ ուղղությամբ: Բազմիցս նշել եմ, որ երբեք գումարի համար չեմ նկարահանվում, հենց դրա համար էլ ընտրում եմ այն կերպարները, որոնք ինձ պարզապես հաճույք կպարգեւեն»:
Երկրում տիրող իրավիճակին լուրջ է վերաբերվում եւ, ինչպես նշել է, խստորեն պահպանում է հակահամաճարակային կանոնները.«Քանի որ աշխատանքի բերումով ավելի շատ դրսում եմ լինում, այս ամիսներին հասկացա, որ տանը մնալն անչափ հաճելի է: Մեկուսացումը շատ ընտանիքների հնարավորություն տվեց ճանաչել միմյանց. մայրերին՝ զբաղվել երեխաների խնամքով, ամուսիններին՝ ավելի շատ ժամանակ անցկացնել իրար հետ: Այնպես որ, իհարկե, հումորով, բայց կարող եմ ասել շնորհակալություն կորոնավիրուսին, որ միմյանց հետ շփվելու հնարավորություն տվեց մարդկանց»:
Ստիպված է եղել 2 ամսից ավելի հեռու լինել որդուց, ինչն էլ ամենասարսափելին է համարում.«Երբեք չէր եղել, որ այսքան երկար ժամանակով որդուցս հեռու լինեի: Նա մեկնել էր Ռուսաստան՝ անձնագրի վավերականության ժամկետը երկարաձգելու, արդեն ժամանակն էր վերադարձի, երբ հայտարարվեց արտակարգ դրություն, փակվեցին ճանապարհները: Եթե անգամ մեկ տարբերակ լիներ նրան բերելու, ես կանեի, սակայն հնարավոր չէր: Շատերը մտածում են, որ սոցցանցերում երեխայիս հանդեպ անսահման սերս ցույց տալը ձեւականություն է, բայց ես ապրում եմ նրանով, եւ նա է իմ միակ ու իսկական սերը: Մեծ նշանակություն եմ տալիս դաստիարակությանն ու կրթությանը, եւ գուցե չափազանցված հնչի, բայց ամեն գիշեր ես եմ նրան քնեցնում` ընկերական զրույցներից եւ հեքիաթներ պատմելուց հետո»:
Ալեքսանդր Բաբասյանը՝ որդու հետ
Հարցին, թե երկար բաժանումն արդյոք ազդել էր իր եւ փոքրիկի հարաբերությունների վրա, դերասանը պատասխանել է.«Հակառակը՝ հայր ու որդի կապն առավել ամրացավ, ջերմացավ: Ոչ մի պարագայում չի կարող իմ եւ որդուս սերը սառել: Իսկ այդ ընթացքում ես հանգիստ եմ եղել այնքանով, որ նա շատ ապահով ձեռքերում էր՝ մայրիկի, տատիկի եւ պապիկի հետ: Շատ կողմ եմ, երբ երեխանեը կապված են լինում մայրիկների հետ, քանզի դա բխում է միայն երեխաների շահերից: Ինչպես նաեւ, իմ եւ որդուս մայրիկի հարաբերություններն էլ չեն կարող վատ լինել, որովհետեւ դրանից կտուժի միմիայն երեխան, իսկ ես միշտ առաջինը մտածում եմ հենց երեխայի մասին: Երեխան ե՛ւ մոր, ե՛ւ հոր հետ պետք է կապված լինի ու սիրի. միայն վատ ծնողը հակառակը կկամենա: Երբ ես վստահ-վստահ խոսում եմ, շատերն են գուցե կարծում, որ գլուխ եմ գովում, սակայն որոշ ժամանակ հետո հասկանում են, որ ասածներս ճիշտ էին: Իմ ու որդուս օրինակով կուզեմ, որ շատ ծնողներ հասկանան, որ երեխային միայն աշխատանքից հետո մեկ ժամ սիրելն ու նրա հետը շփվելը դեռ ոչինչ է. նրա հետ պետք է ընկերանալ եւ ամուր կապ ստեղծել: Ինձ համարում եմ օրինակելի հայր եւ ուզում եմ, որ որդուս համար էլ հետագայում լինեմ լավ հոր օրինակ»:
Ալեքսանդրն անդրադարձել է նաեւ իր համար օրինակելի կնոջ եւ մոր կերպարին. «Յուրաքանչյուր երեխա իր մորը նայելիս սրբություն պետք է տեսնի»,-նշել է նա եւ հավելել, որ գնահատում է հավատարմությունը, ջերմությունն ու կին մնալը. «Հակառակ դեպքում, երբ, օրինակ, կանայք սկսում են ձեռք բերել տղամարդկային հատկանիշներ, բառապաշար, վատ վարք, կորցնում են իրենց հմայքն ու նմանվում են տղամարդու»:
Տեքստը՝ Կիմա Միրզոյանի/Bravo.am/
Լուսանկարները՝ Ալեքսանդր Բաբասյանի արխիվից
