Լայանան՝ նոր ընտրյալի, ամուսնալուծության, նախկին ամուսնու նոր ընտրյալի մասին
«Արդեն մոտ 2 տարի է ամուսնալուծված եմ: Ամեն ընտանիք մութ անտառ է, շատ էին տարաձայնությունները, հասունացել էր այդ պահը, և կոնկրետ մեկ պատճառ չէր: Ընտանիքը երբեմն արտաքինից թվում է իդեալական, բայց ներսում կոնֆլիկտներ, տարաձայնություններ են: Մենք անհամատեղելի մարդիկ ենք, այսօր ժամանակներըը փոխվել են և այնպես չէ, որ հանուն ինչ-որ բանի 2 մարդ ապրեն միասին, ամուսնալուծությունն առաջին բանն է, որ անում են շատերը: Մենք դեռ 12 տարի ապրել ենք միասին, մարդիկ 3-4 ամիս են ապրում, ամուսնանում ու բաժանվում են: Փուլեր են եղել, որ բանը հասել է բաժանման, բայց չենք բաժանվել, բայց գալիս է մի պահ, որ անիմաստ է այլևս շարունակել: Փառք Աստծո, որ այդ ամուսնությունից այսօր ունենք 2 սիրուն ու հրաշք բալիկներ»,- Tert.am Life-ի հետ զրույցում՝ խոսելով իր և ամուսնու՝ պրոդյուսեր Ռոլանդ Պողոսյանի ամուսնալուծությունից, պատմեց երգչուհի Լայանան:
Նա նշեց, որ նախկին ամուսնու հետ հարաբերությունները լավ են, ընկերական, իսկ երեխաների հետ շփումը կա:
«Երեխաների վրա միշտ էլ ծնողների բաժանությունն այդքան էլ լավ չի անդրադառնում: Ուղղակի, երբ փոքր տարիքում են լինում, հոգեբանական տրավմայի չեն ենթարկվում: Բաներ կան, որ բացատրում ենք երեխաներին, լսում ու տեսնում են, բայց ընտանիքում մեծանալը, բնականաբար, ըստ իս՝ ավելի լավ է»,- նշեց երգչուհին ու հավելեց, որ աղջիկն արդեն 9 տարեկան է, իսկ որդին՝ շուտով կդառնա 5 տարեկան:
Լայանան նաև նշեց՝ տեղյակ է, որ նախկին ամուսինն ընտրյալ ունի, սոցհարթակներում նկարներ կան հրապարակված:
«Ազատ մարդ է, պետք է իր կյանքը դասավորի, սա է իմ վերաբերմունքը: Իսկ, թե ես որքանով եմ պատրաստ նոր հարաբերությունների՝ ասեմ, որ ես էլ ունեմ իմ սրտի մարդուն, իմ ընտրյալին իմ կողքին, բայց առայժմ չեմ հանրայնացնելու նրա անունը»,- նշեց երգրուհին:
Երգելուն զուգահեռ հիմա նաև որպես հանդիսավար է աշխատում, տարբեր միջոցառումներ է վարում: Հիմա երեխաներին ավելի շատ եմ ժամանակ հատկացնում, քան առաջ»,- անկեղծացավ Լայանան:
Նա նշեց, որ որպես երգչուհի երազում է անհոգ լինելու մասին: «Չէի ցանկանա ավելի հայտնի լինել, կուզեի անհոգ լինել և՛ աշխատանքի առումով, և՛ երկրիս համար: Մենք այն բնագավառում ենք, կարծես ռումբի վրա լինենք, և ցանկացած իրադարձություն անմիջական կապ ունի մեր հոգեվիճակի հետ: Որպես քաղաքացի և մայր երազում եմ, որ Հայաստանում անհոգ ու խաղաղ ապրենք ու երբեք չմտածենք երկիրը լքելու մասին (թեև միշտ ծովափնյա քաղաքում ապրելու երազանք եմ ունեցել):
Այս ամենից բացի ուրիշ պլաններ էլ ունեմ: 3-4 տարի կարուձև եմ սովորել, հետագայում ուզում եմ նորաձևության կենտրոն բացել: Ուզում եմ, որ աղջիկս էլ նկարի, հող եմ նախապատրաստում նրա համար: Ես միշտ ստեղծագործական պրոցեսից հաճույք եմ ստանում, ինչ էլ անեմ՝ միշտ արվեստի շուրջ եմ պտտվում»,- ամփոփեց երգչուհին:
