Էստոնիայի օդային տարածք ԱԹՍ-ներ են մտել. ԱԳ նախարար
Սեպտեմբերի 1-ի գիշերը անօդաչու թռչող սարքեր են մտել Էստոնիայի օդային տարածք, ինչի կապակցությամբ հայտարարվել է օդային սպառնալիք: Այս մասին հայտնել է երկրի արտաքին գործերի նախարար Մարգուս Ցահքնան։
«Վաղ առավոտյան Էստոնիայի մի քանի տարածաշրջանում նախազգուշացում է հայտարարվել օդային սպառնալիքի մասին։ Անօդաչուները, շարժվելով Էստոնիայի արևելյան սահմանին զուգահեռ, նաև մտել են Էստոնիայի օդային տարածք, ինչի կապակցությամբ պաշտպանության ուժերն օդային տագնապ են հայտարարել։ ՆԱՏՕ-ի Բալթյան տարածաշրջանի օդային տարածքի պարեկային կործանիչները թռել են Էմարի ավիաբազայից՝ իրադրությանն արձագանքելու համար», – ասվում է Էստոնիայի ԱԳՆ մամուլի տեղեկագրում։
Թե որ երկրի անօդաչուներն են խախտել Էստոնիայի օդային տարածքը, չի հաղորդվում։
ԱԳ նախարարի խոսքով՝ «ամենակարևորն այն է, որ սպառնալիքն անցել է»։
«Մենք նոր երաշխիքներ ենք ստացել այն մասին, որ Էստոնիայի օդային տարածքը պահպանվում է, և որ վճռական, արագ ու պլանավորված գործողություններ են ձեռնարկվում դրա պաշտպանության համար», – նշել է նա։
