Բուհերի ուսման վարձավճարների չափը ԿԳՄՍ նախարարությունը չի սահմանում
ԿԳՄՍ բարձրագույն և հետբուհական մասնագիտական կրթության վարչության պետի տեղակալ Լուսինե Գրիգորյանը Pressmedia.am-ի հետ զրույցում անդրադառնալով բուհերի առաջին կուրսի ուսանողների ուսման վարձի բարձրացման խնդրին, նշեց, որ ուսման վարձավճարերի հետ կապված հարցերը գտնվում են բուհերի իրավասության ներքո, քանի որ կրթական ծառայությունները մատուցում է բուհը և, հետևաբար, ուսման վարձավճարի չափը, բուհի խորհրդի որոշմամբ, ինքն է սահմանում: Ինչ վերաբերում է նախարարության կողմից քայլեր ձեռնարկելուն, ապա դա դուրս է գերատեսչության լիազորություններից: Բացի այդ, բուհերի գործունեությունը վերահսկելու կարիք չկա, քանի որ օրենքներով և բուհերի ներքին կարգապահական կանոնակարգերով զեղջերի համակարգը հստակ սահմանված է:
«Օրենքներով որոշակի արտոնություններ են սահմանված որոշակի կատեգորիաների համար, որի համաձայն ամբողջությամբ փոխհատուցվում է ուսման վարձավճարը: Նաև ունենք կառավարության որոշում, որտեղ ընտանիքների սահմանային միավորից բարձր միավորներ ունեցող ուսանողների ուսման վարձի մինչև 100% զեղչեր են արվում: Բացի այդ, օրենքը բուհերի վրա հստակ պարտավորություն է դրել, որ վճարովի համակազմի ուսանողների 7%-ի շրջանակում հստակ կատեգորիաների համար զեղջեր իրականացնեն, հաշվի առնելով նաև բարձր առաջադիմությունը: Գործում են նաև տարբեր կրթաթոշակներ սահմանելու մասին որոշումներ, որոնք ևս բուհերի իրավասության ներքո է: Այնպես որ, բուհերն իրենք ևս ունեն անհատական զեղջային համակարգեր, և եթե ուսանողները ցուցաբերում են որոշակի առաջադիմություն, օգտվում են այդ համակարգերից»,- ասաց Լ. Գրիգորյանը:
Նա նաև նշեց, որ նախորդ ուստարվա երկրորդ կիսամյակում կառավարության կողմից իրականացվել է թվով 14-րդ ծրագիրը, որով նախատեսված էր մեկանգամյա միջոցառում, որի համաձայն 90 և բարձր ՄՕԳ ունեցող ուսանողները կարողացան ստանալ օգնություն:
«Եթե անհրաժեշտություն առաջանա, ապա նորից միջոցառումներ կմշակվեն: Մյուս կողմից, ինչպես նախորդ ուսումնական տարում COVID-19-ով պայմանվորված, այնպես էլ հիմա սոցիալական իրավիճակով պայմանավորված բուհերը կշարունակեն ուսման վարձերի վճարման անհատական ժամանակացույցերի կազմման գործընթաց իրականացնել և անհատական մոտեցում կցուցաբերեն, և շատ խստություն չեն կիրառի ուսանողների նկատմամբ: Դեռևս 2013-ից գործում է նաև ուսանողների վարկավորման ծրագիրը, որի որոշ մասը սուբսիդավորվում է պետության կողմից: Եվ մինչև դեկտեմբերի 30-ը այդ վարկերից օգտվելու պարագայում, 80-ից ավել մոգ ունեցող ուսանողների համար պետությունը տոկոսադրույքն ամբողջությամբ կշարունակի սուբսիդավորել, իսկ ավելի ցածր ՄՕԳ-երի դեպքում կսուբսիդավորի 9% վարկի 5%-ը: Այնպես որ ուսանողները կարող են նաև այդ հնարավորությունից օգտվել, որը վերաբեում է նաև առաջին կուրսերի ուսանողներին»,- ասաց Լ. Գրիգորյանը:
Արփինե Նիկողոսյան
