Հայաստանում էժան ու հին մեքենաները կտրուկ թանկացել են

Ռուս-ուկրաինական պատերազմի հետևանքով Ռուսաստանում, օրինակ, եվրոպական, ամերիկյան կամ արևելյան երկրների արտադրության ապրանքների գները կտրուկ բարձրացել են։ Օրինակ՝ հեռախոսների, այդ թվում՝ iPhone-ի գնը նվազագույնը 30 տոկոս աճել է։ Նույնկերպ կենցաղային այլ ապրանքներն են թանկացել, որոնք այլևս չեն վաճառվելու ՌԴ-ում՝ պայմանավորված տնտեսական բնույթի սանկցիաներով։ Նույն կերպ արտասահմանյան արտադրության մեքենաներն են թանկացել Ռուսաստանում։

Եւ եթե Ռուսաստանում ոչ տեղական արտադրության ապրանքների կտրուկ գնաճը հիմնավորված է և բացատրվում է Եվրոպայի, ԱՄՆ-ի ու այլ երկրների կիրառած սանկցիաներով, ապա անհասկանալի է, թե ինչու են Հայաստանում կտրուկ թանկացել, օրինակ, ավտոմեքենաները, այն էլ՝ ոչ թե նոր, այլ երկրոդային շուկայի տարեթվով հին ավտոմեքենաները։

Ընդ որում՝ որքան հին է ավտոմեքենան, այնքան ավելի մեծ է գնաճը, ինչը ոչ մի տրամաբանության մեջ չի տեղավորվում, հատկապես, երբ խոսքը ռետրո հնության մեքենաների մասին չէ։

Օրինակ՝ 1995-2000 թթ, արտադրության Mercedes C-Class-ների գինն այսօր միջինը 1000-1500 դոլարով բարձրացել է։ Օրինակ, մինչև վերջերս այս Mercedes-ները, որոնք թեև ամուր ու դիմացկուն մեքենաներ են, բայց արդեն համարվում են իրենց դարն ապրած փոխադրամիջոցներ, վաճառում էին միջինը 3500 դոլարով, նույնիսկ ավելի քիչ։ Այսօր դրանք առաջարկվում են 4500-5500 դոարով, նույնիսկ մի բան էլ՝ բարձր։ Նույնը նաև 1998-2005 թթ․ արտադրության E46 թափքով BMW 3-Series-ի դեպքում է՝ դարձյալ միջինը 4500 դոլար և ավելի գին են պահանջում, մինչդեռ մեկ-երկու ամիս առաջ դրանք ավելի ցածր գնով էին վաճառվում։

Միջինը 1000 դոլարով բարձրացել են նաև Հայաստանում բյուջետային դասի ամենապահանջված մեքենաներից մեկի՝ Nissan Tiida-ի գները: Կախված տարեթևից՝ այս մեքենաներն այսօր շուկայում առաջարկվում են 4000 դոլարից սկսած՝ մինչև 5000, 5500, նույնիսկ ավելի։ Մինչդեռ նախկինում այս մեքենաները կարելի էր ձեռք բերել 3000-3500 դոլարի սահմաններում։ Մի քիչ ավելի բարձր սեգմենտի մեքենաներն էլ, որոնց գինը նախկինում 6000-7000 դոլարի սահմաններում էր, այսօր դարձել են 8000-9000 դոլար։

Հիմնական գնաճը, սակայն, զգացվում է միջին դասի ու ցածր գնային սեգմենտի (4000-8000 դոլար ) մի քիչ ավելի բարձր դասի, բայց ոչ լրիվ նոր մեքենաների վրա (միջինը 8000-15000 դոլար)։ Ավելի թանկարժեք մեքենաները հիմնականում պահպանել են իրենց գները։

Այս ամենի համար այս պահին մեկ բացատրություն կա՝ պատերազմի հետևանքով ՌԴ քաղաքացիների մեծ հոսքը Հայաստան։ Հայաստանցիները հույս ունեն, որ ռուսները Հայաստանում կսկսեն մեծ թվով մեքենաներ գնել, որոշները՝ այստեղ վարելու, որոշներն էլ ՌԴ տեղափոխելու նպատակով, ուստի առիթից օգտվել և բարձրացրել են գները

Ամբողջական հոդվածը կարող եք կարդալ այս հասցեով՝ : https://hraparak.am/post/a0de07e0477471b2ac941f3407975eef